Tugann Máire léargas dúinn ar a ngairm mar Oifigeach Riaracháin sa Roinn Airgeadais. Ó obair a dhéanamh i rannóg na Seasmhachta Airgeadais ar dtús go dtí obair a dhéanamh anois sa Rannóg um Bheartas an Bhainc Cheannais sa Roinn, labhraíonn Máire linn faoin gcaoi a gcabhraíonn a líofacht sa Ghaeilge leo ina ról.
Inis dúinn faoi do ról.
Thosaigh mé ag obair sa Rannóg Bhaincéireachta sa Roinn Airgeadais i mí Mheán Fómhair 2022. Ar dtús, bhí mé ag obair sa Rannóg um Sheasmhacht Airgeadais. Déantar aon rioscaí a d’fhéadfadh a bheith ann i dtaca leis an gcóras airgeadais a mheas agus déantar rioscaí a laghdú.
Bhog mé chuig an Rannóg um Pholasaí an Bhainc Cheannais le déanaí. Tá an Banc Ceannais faoi chúram na Roinne Airgeadais agus tá an rannóg freagrach as polasaithe i dtaca le cumhachtaí an Bhainc Cheannais. Tá baint láidir ag an gCreat Freagrachta Aonair (Acht an Bhainc Cheannais 2023), a tháinig i bhfeidhm in 2023, le mo chuid oibre.
Cén fáth ar chuir tú isteach ar do ról?
Chuir mé isteach ar an gClár OR do Chéimithe toisc gur thuig mé go raibh neart deiseanna ar fáil sa státseirbhís. Bíonn neart deiseanna ann dul chun cinn a dhéanamh ar do ghairm sa státseirbhís agus spreag sé sin mé. Thuig mé go mbeinn in ann scileanna nua a fhorbairt agus, nuair a bhí mé ag freastal ar an gcoláiste, thuig mé go raibh post san earnáil phoiblí uaim.
Cad í an ghné is luachmhaire de do phost, dar leat?
An chaoi ar féidir liom cur le polasaithe. Braithim go mbíonn meas ag daoine eile sa Roinn ar an obair a dhéanaim agus spreagtar mé chun mo chuid tuairimí a roinnt. Braithim go dtugtar aitheantas do dhaoine as obair chura a dhéanamh sa Roinn agus cuireadh neart deiseanna ar fáil dom, m.sh. freastal ar imeachtaí leis an Aire nó leis an Ard-Rúnaí.
Cad iad na deiseanna agus na tacaíochtaí a chuirtear ar fáil duit?
Braithim go bhfuil tacaíochtaí éagsúla ar fáil sa Roinn. Cuireann an Roinn Airgeadais réimse leathan cúrsaí inmheánacha ar fáil; tá cúrsa á dhéanamh agam anois i réimse na Seirbhísí Airgeadais. Chabhraigh an cúrsa go mór liom i mo phost agus tá léargas níos fearr faighte agam ar réimse na seirbhísí airgeadais. Spreagann an Roinn muid chun cur lenár scileanna i gcónaí chun a chinntiú go bhfuil an t-eolas cuí againn.
Tá córas meantóireachta idir piaraí i bhfeidhm sa Roinn, agus cabhraíonn sé sin go mór leat agus tú ag tosú amach. Cuirfear tús le córas meantóireachta go luath, rud a bheidh an-tairbheach. Bhunaigh an Roinn Gréasán Cothromais Inscne le déanaí. Cuirtear imeachtaí ar siúl go rialta agus tá an gréasán an-ghníomhach maidir le moltaí a lorg.
Cuireann an Roinn uaireanta oibre solúbtha ar fáil, mar aon le cianobair, buntáiste mór.
Cad iad na deiseanna a chuir an ról seo ar fáil duit?
Cuireadh neart deiseanna ar fáil dom i mo ról sa Roinn. Chríochnaigh mé an Clár do Chéimithe le déanaí. Díríonn an cúrsa ar phríomhinniúlachtaí na státseirbhíse agus tugann sé deis duit líonrú a dhéanamh le hORanna eile sa státseirbhís.
Bíonn an deis agam comhoibriú le Ranna agus gníomhaireachtaí éagsúla. Agus mé ag obair i réimse na Seasmhachta Airgeadais, bhí an deis agam freastal ar imeacht a chuir an Oifig um Phleanáil Éigeandála ar siúl.
Bhí an deis agam freastal ar imeachtaí agus ar chomhdhálacha éagsúla chun mo ghréasán a fhorbairt.
Bhí an deis agam a bheith sa Dáil le linn na ndíospóireachtaí faoin mbuiséad, agus ghlac mé nótaí.
Cad a chuir iontas ort ó thosaigh tú ag obair sa ról seo?
Chuir gné shóisialta an phoist iontas orm. Laistigh den Roinn, tá Club Sóisialta a eagraíonn imeachtaí don Roinn, m.sh. turais, quizeanna srl. Tugann sé deis iontach duit bualadh le daoine ó rannóga eile.
Cad í an ghné is mó de do ról a mbaineann tú sult aisti?
Is maith liom an éagsúlacht atá le brath i mo phost agus castacht an róil. I mo rannóg féin, bímid ag plé le ceisteanna éagsúla agus bíonn an deis agam obair a dhéanamh ar thascanna éagsúla.
Bainim sult as an ngné shóisialta den phost chomh maith. Braithim go bhfuil an t-ádh orm a bheith ag obair i Rannóg ina dtugann gach duine tacaíocht dá chéile agus tá atmaisféar ginearálta na Rannóige an-dearfach.
An molfá gairm san earnáil phoiblí do dhaoine eile agus cén fáth?
Mholfainn gairm sa státseirbhís do dhaoine eile. Creidim gur féidir leat dul chun cinn a dhéanamh agus obair a dhéanamh in áiteanna éagsúla. Táim ag obair sa Roinn Airgeadais le níos mó ná bliain anois agus d’oibrigh mé in dhá rannóg éagsúla cheana féin agus d’fhoghlaim mé scileanna nua.
Ar mhaith leat aon rud eile a roinnt?
Táim líofa sa Ghaeilge agus buntáiste mór í an líofacht seo i mo ról. Bhí mé in ann cabhair a thabhairt do chomhghleacaithe eile trí rudaí a aistriú agus ceapaim go bhfuil an Ghaeilge an-tairbheach.